Gwasanaethau ar ôl y Canlyniadau ac Apeliadau

Ar ôl cyhoeddi canlyniadau pob cyfres arholiadau, mae CBAC yn cynnig dewis o wasanaethau ar ôl y canlyniadau, yn cynnwys:

Ail-wiriad clercyddol – ail-wiriad o’r holl weithdrefnau clercyddol sy’n arwain at gyhoeddi canlyniad

Adolygu'r marcio ar ôl y canlyniadau – adolygiad o'r marcio gwreiddiol i sicrhau bod y cynllun marcio y cytunwyd arno wedi’i ddefnyddio'n gywir

Mynediad at sgriptiau – fersiwn electronig o'r sgript

Adolygu'r cymedroli ar ôl y canlyniadau – adolygu'r cymedroli gwreiddiol er mwyn sicrhau bod y meini prawf asesu wedi'u cymhwyso'n deg, yn ddibynadwy ac yn gyson

Rhaid i’r ganolfan gofrestru gyflwyno ceisiadau am y gwasanaethau hyn. Rhaid i ymgeiswyr felly siarad â’r ysgol neu’r coleg os ydyn nhw am wneud cais am Wasanaeth ar ôl y Canlyniadau. Mae Gwybodaeth i Ymgeiswyr Preifat i’w gweld ar waelod y dudalen hon.

Mae cyngor ac arweiniad ar gael yn y dogfennau canlynol:

• Canllaw Cyflym i Wasanaethau Ar ôl y Canlyniadau CBAC
• Gwasanaethau ar ôl y Canlyniadau CGC
• Ffioedd a Dyddiadau Cau Gwasanaethau ar ôl y Canlyniadau - Cyfres Tachwedd 2023
• Ffioedd a Dyddiadau Cau Gwasanaethau ar ôl y Canlyniadau - Cyfres Ionawr 2024

Mae CBAC yn dilyn yr un gweithdrefnau ym mis Ionawr â gweithdrefnau'r CGC ar gyfer cyfresi Mehefin a Thachwedd.

Os ydych chi am gael mynediad at sgriptiau, neu am gyflwyno cais am adolygiad o farcio neu gymedroli, gall canolfannau wneud hynny ar-lein drwy wefan ddiogel CBAC.

Os oes gan ymgeiswyr preifat unrhyw bryderon am ganlyniadau eu harholiadau ac os ydynt yn dymuno gwneud cais am adolygiad, neu os ydynt yn dymuno cael mynediad at sgriptiau, dylent gysylltu â'r ganolfan sydd wedi'u cofrestru am gymorth. Gall ymgeiswyr preifat hefyd wneud cais yn uniongyrchol i CBAC drwy ofyn am ffurflen gais gan GAC@cbac.co.uk.

Mae CBAC yn dilyn prosesau'r CGC ar apeliadau fel y dogfennwyd yn nogfen y CGC Canllaw i brosesau apeliadau'r cyrff dyfarnu.

Mae’r CGC wedi cyhoeddi dogfen o Gwestiynau Cyffredin yn ymwneud ag Apeliadau ym mis Mehefin 2023.

Mae'r ddogfen Canllaw i Apeliadau yn amlinellu prosesau apelio CBAC ynghylch adolygiadau o ganlyniadau, camymddwyn, trefniadau mynediad ac addasiadau rhesymol, ystyriaeth arbennig a phenderfyniadau gweinyddol eraill ynghylch arholiadau ac asesiadau.

Caiff tystysgrifau eu rhyddhau i ganolfannau tua 12 wythnos ar ôl cyhoeddi canlyniadau.

Gall canolfannau newid manylion personol ymgeiswyr a gofrestrir am gymwysterau CBAC hyd at y Dyddiadau Cau Argraffu Tystysgrifau, heb dalu costau ychwanegol. 

• Cyfres Tachwedd – 31 Ionawr
• Cyfres Ionawr – 31 Mawrth
• Cyfres Mehefin – 9 Medi

Rhaid i ganolfannau roi gwybod i ni am unrhyw newidiadau i fanylion personol ymgeisydd drwy e-bostio ein tîm cofrestriadau gyda llythyr eglurhaol sy'n rhoi'r manylion cywir. Yna, bydd tystysgrif wreiddiol newydd yn cael ei dosbarthu i'ch canolfan (ni chaiff ei hanfon yn uniongyrchol at yr ymgeisydd). Bydd tâl am y gwasanaeth hwn. Gweler ein llyfryn ffioedd am wybodaeth pellach.

Gall canolfannau ddinistrio tystysgrifau'n gyfrinachol os nad ydynt yn cael eu hawlio gan ymgeiswyr 12 mis o'u derbyn.