Sgiliau Hanfodol ar gyfer Bywyd a Gwaith

Cymwysterau seiliedig ar unedau yw cymwysterau Sgiliau Hanfodol ar gyfer Bywyd a Gwaith CBAC. Mae'r rhain ar gael o radd Mynediad 1 i Lefel 3 ac yn cynnig y cyfle i ddysgwyr ddatblygu sgiliau cyfathrebu, llythrennedd digidol, cyflogadwyedd a rhif. Dull asesu pob uned yw portffolio 'mini' i'w asesu'n fewnol gyda'i ansawdd i'w sicrhau'n allanol.

Mae pob uned ar wahân, ac yn caniatáu felly i ddysgwyr ganolbwyntio ar y sgiliau penodol maen nhw am eu gwella neu am eu meistroli am y tro cyntaf. Parhau i esblygu mae'r sgiliau sydd eu hangen yn y byd gwaith. Mae cymwysterau SHBG CBAC yn cynnig strwythur dynamig i ddysgwyr ar gyfer paratoi at ofynion sy'n newid.

Mae SHBG CBAC yn addas ar gyfer dewis eang o ddysgwyr mewn lleoliadau gwahanol, yn eu plith:

• pobl mewn addysg bellach;
• oedolion sy'n dychwelyd i ddysgu;
• dysgwyr yn y gwaith;
• addysg yn y gymuned a gwirfoddolwyr lleol;
• staff addysgu;
• pobl mewn addysg amgen;
• pobl y nodwyd bod ganddynt 'fylchau sgiliau' yn yr hyn maen nhw'n gallu ei wneud ar hyn o bryd.

Gan fod yr unedau hyn yn deillio o'r gyfres o gymwysterau Sgiliau Hanfodol Cymru (SHC), gellir ystyried cyflawniad SHBG fel llwybr dilyniant os yw'r dysgwr yn dymuno hynny.