Dysgu Proffesiynol RHAD AC AM DDIM i gefnogi cymwysterau Gwneud-i-Gymru Ton 3 wedi'i gadarnhau
Rydym yn falch iawn o gyhoeddi pecyn cynhwysfawr o gyfleoedd dysgu proffesiynol (DP) RHAD AC AM DDIM i gefnogi'r gwaith o gyflwyno ein cyfres newydd o gymwysterau Gwneud-i-Gymru, gan gynnwys cymwysterau TAAU, Sylfaen, y Gyfres Sgiliau a Phroject Personol.
Wedi'u cynllunio mewn ymateb i adborth gan ganolfannau ledled Cymru, bydd y deunyddiau dwyieithog ar-lein hyn ar gael ar alw, gan ganiatáu i ymarferwyr gael mynediad at gefnogaeth ar adeg sy'n gyfleus iddynt. Bydd y deunyddiau, wedi'u recordio ymlaen llaw gan arbenigwyr pwnc hyfforddedig, yn cefnogi cymwysterau a fydd yn cael eu haddysgu am y tro cyntaf o fis Medi 2027. Hefyd, bydd cyfleoedd i athrawon pwnc ymuno â chyfarfodydd Fforymau Pwnc ar-lein hwyrnos bob tymor i ofyn cwestiynau i'n harbenigwyr a rhwydweithio â chydweithwyr/canolfannau eraill.
|
|
Wrth sôn am y lansiad, dywedodd Nia Jones, Rheolwr Dysgu Proffesiynol: "Rydym yn falch o gynnig pecyn pwrpasol a chynhwysfawr o gyfleoedd dysgu proffesiynol i athrawon ledled Cymru, a fydd yn eu helpu i gyflwyno ein cymwysterau newydd yn hyderus. Yn seiliedig ar adborth gan ganolfannau, rydym yn cyflwyno deunyddiau addasadwy a fydd ar gael ar alw, y bydd ymarferwyr yn gallu cael mynediad atynt pan fydd yn gyfleus iddynt. Bydd pob adnodd yn cael ei gyflwyno gan arbenigwr pwnc ac yn cael ei gefnogi gan amrywiaeth eang o ddeunyddiau ategol. Yn ogystal, bydd ein timau pwnc yn parhau i roi cyngor ac arweiniad ymarferol drwy ein rhwydweithiau Fforymau Pwnc." |
Cefnogaeth wedi'i deilwra ar gyfer pob cymhwyster
Bydd deunyddiau DP wedi'u recordio ymlaen llaw ar gael ar gyfer yr holl gymwysterau TAAU, Sylfaen, Cyfres Sgiliau a Phroject Personol, ac ar gyfer pob lefel. Bydd y rhain yn arwain ymarferwyr drwy ofynion y manylebau, gan dynnu sylw at gynnwys allweddol a chynnig awgrymiadau ar gyfer cyflwyno'r cymwysterau'n effeithiol yn yr ystafell ddosbarth.
Bydd y set gyntaf o ddeunyddiau yn cael ei chyhoeddi o dymor yr haf a byddant ar gael ar ein safle Porth diogel.
Cael y wybodaeth ddiweddaraf
Bydd y rhaglen Dysgu Proffesiynol lawn ar gyfer 2026/27 yn cael ei chyhoeddi ym mis Gorffennaf. I gael y wybodaeth ddiweddaraf am ddeunyddiau DP newydd, digwyddiadau, adnoddau ac ati yn syth i'ch mewnflwch, tanysgrifiwch i'n rhestr bostio.
I weld y newyddion, cyfleoedd a Chwestiynau Cyffredin diweddaraf sy'n ymwneud â'r cymwysterau Ton 3 newydd, ewch i'r adran 'Yn arbennig i Gymru. Yn barod i'r byd' ar ein gwefan, sy'n cynnwys amrywiaeth eang o ddeunyddiau ac adnoddau cefnogi.