Arbenigwyr ffilm blaenllaw yn siaradwyr gwadd yn ein seremoni wobrwyo fawreddog

Rydym yn falch iawn o gyhoeddi enwau'r siaradwyr gwadd fydd yn ymuno â ni yn y 9fed Gwobrau Delwedd Symudol. Mae'r seremoni wedi'i chydnabod gan athrawon a darlithwyr cyrsiau ffilm a chyfryngau mewn sefydliadau ledled y DU, yn ogystal â ffigyrau blaenllaw yn y diwydiant ffilm. 

Dyma oedd gan Jenny Stewart, Swyddog Pwnc Astudiaethau Ffilm CBAC Eduqas, i'w ddweud am y cyhoeddiad: "Mae'n fraint cael arbenigwyr ffilm blaenllaw yn rhan o'n seremoni wobrwyo. Bydd eu talent a'u profiad helaeth yn ysbrydoli'r sawl fydd yn bresennol, ac rwy'n siŵr y byddant hwythau hefyd wrth eu bodd â safon y dalent fydd yn cael ei harddangos yn ystod y digwyddiad." 

Cynhelir ein digwyddiad blynyddol yn y British Film Institute yn Llundain ddydd Gwener, 24 Chwefror.

Dyma'r rhestr arbennig o arbenigwyr ffilm benywaidd fydd yn ymuno â ni: 

Anna Smith

Anna Smith  
Beirniad ffilm a darlledwr blaenllaw yn y DU yw Anna Smith. Yn gyn-Lywydd yr UK Critics' Circle, Anna sy'n cyflwyno'r podlediad poblogaidd Girls On Film, a gafodd ei enwi yn y ‘Podlediad Ffilm Ffeministaidd Gorau’ gan gylchgrawn Stylist. Mae Anna'n cyfrannu i Deadline Hollywood, Time Out, Metro a The Guardian, ac mae hi'n ymddangos yn rheolaidd ar Radio 4 a Sky TV ac yn aml yn cymryd lle Mark Kermode ar The Film Review ar sianel BBC News. Mae Anna wedi cyflwyno yng Ngwobrau Delwedd Symudol CBAC Eduqas am y tair blynedd diwethaf. 

Faye Ward

Faye Ward

Faye Ward yw Cyfarwyddwr Creadigol a Sylfaenydd Fable Pictures. Cyn sefydlu Fable, roedd Faye hefyd yn rhan o dîm cynhyrchu cyfres Left Bank Pictures, THE CROWN, sydd wedi ennill sawl gwobr.  


Dan enw Fable, cynhyrchodd Faye y ffilm STAN & OLLIE, a chafodd ei henwebu am BAFTA ar ei chyfer. Yn y ffilm mae John C. Reilly a Steve Coogan, a enwebwyd am wobr Golden Globe a BAFTA yn y drefn honno am eu perfformiadau.  


Treuliodd Faye lawer o flynyddoedd yn flaenorol yn Ruby Film & Television, lle roedd hi'n gweithio yn cynhyrchu'r gyfres deledu BBC DANCING ON THE EDGE a enwebwyd am wobr Golden Globe.

Kate Leys

Kate Leys 

Golygydd sgriptiau a straeon yw Kate Leys. Ers blynyddoedd lawer, mae hi wedi gweithio ar brif ffilmiau, ffilmiau byrion a chyfresi teledu ledled y byd. Mae hi hefyd yn gweithio ar raglenni dogfen, animeiddiadau, podlediadau a theatr. Mae hi'n gweithio ar draws y byd: mewn un diwrnod yn unig y llynedd fe weithiodd hi gyda gwneuthurwyr ffilmiau yn Vienna, Beirut, Tbilisi a Maputo; ac mae hi wedi gweithio gyda gwneuthurwyr ffilmiau brodorol, yn y Cylch Arctig yn arbennig, ers sawl blwyddyn. Rhai o'r ffilmiau mae hi wedi gweithio arnyn nhw'n ddiweddar yw BIRCHANGER GREEN (yn cael ei ôl-olygu, y DU); THE UNBORN BIRO (ffilm fer, Sundance 2023) a JEVIDA (enillydd y ffilm orau yng Ngŵyl Ffilmiau Helsinki 2022).  


Bu'n bennaeth datblygu mewn sawl cwmni gan gynnwys Film4 yn y DU, lle roedd hi'n gweithio am 5 mlynedd yn rhan o'r tîm bach oedd yn comisiynu ac yn datblygu rhai o brif ffilmiau mwyaf llwyddiannus y DU, yn cynnwys FOUR WEDDINGS AND A FUNERAL a TRAINSPOTTING.  

Larushka

Larushka Ivan-Zadeh

Ers 15 mlynedd a mwy, mae Larushka Ivan-Zadeh wedi bod yn Brif Feirniad Ffilm ym Metro, sef papur newydd mwyaf cylchredol y DU. Larushka hefyd yw beirniad Times Radio a The Lady Magazine ac mae hi'n darlledu'n rheolaidd ar draws y BBC.  


Mae Larushka wedi bod ar sawl rheithgor o fewn y diwydiant, yn fwyaf diweddar ar gyfer BAFTA a Gwobrau Ffilmiau Annibynnol Prydain. 

I gael rhagor o wybodaeth am y gwobrau ac i weld enillwyr y gorffennol, ewch i'n tudalen we Gwobrau Delwedd Symudol. 


Byddwch yn rhan o'r sgwrs ar ein sianeli cyfryngau cymdeithasol gan ddefnyddio'r hashnod #GwobrauDelweddSymudol2023  


Twitter: @cbac_wjec  
Instagram: @cbacifyfyrwyr