TGAU Ffilm a Chyfryngau Digidol - Dysgu o 2026

Bydd y cymhwyster TGAU Ffilm a Chyfryngau Digidol yn cefnogi'r Cwricwlwm i Gymru drwy wneud y canlynol:

• Cefnogi'r datganiadau o'r hyn sy'n bwysig, gan roi cyfle i'r dysgwyr: 
  
  • fynd i’r afael â genres, technegau, offer, deunyddiau a dulliau sy'n eu galluogi i ddod yn unigolion chwilfrydig a chreadigol 
  • dod i ddeall y ffordd y mae’r celfyddydau mynegiannol yn cyfathrebu drwy ddulliau gweledol, corfforol, geiriol, cerddorol a thechnolegol 
  • meithrin eu dychymyg a thynnu ar eu profiadau, eu sgiliau a’u doniau er mwyn iddyn nhw ddod yn artistiaid creadigol eu hunain 
  • edrych ar waith o ddiwylliannau a chymdeithasau amrywiol, gan ddysgu am eu dylanwadau, eu hanesion a'u heffaith 
  • ystyried gwaith creadigol mewn amrywiaeth o gyfryngau, ffurfiau, genres ac arddulliau 
  • dysgu sgiliau dadansoddi pwysig o fireinio a dadansoddi 
  • adfyfyrio ar effeithiolrwydd eu gwaith eu hunain a gwaith eraill, gan gynnwys gwaith artistiaid amrywiol o Gymru a thu hwnt 
  • bod yn arloesol a beiddgar, a chreu gwaith unigol 
  • cyfathrebu drwy amrywiaeth o ffurfiau a chyfryngau digidol
• Cefnogi'r egwyddorion cynnydd drwy annog dysgwyr i: 
  
  • archwilio, profi, dehongli, creu ac ymateb i ystyr sy'n gynyddol gymhleth 
  • datblygu dysgu cysyniadol sy'n gynyddol soffistigedig 
  • datblygu defnydd mwy soffistigedig o sgiliau perthnasol a'r gallu i drosglwyddo sgiliau a gwybodaeth bresennol i gyd-destun newydd.
• Cefnogi'r ystyriaethau pwnc-benodol ar gyfer y Ffilm a Chyfryngau Digidol drwy roi cyfle i ddysgwyr ystyried: 
  • Agweddau ar gyn-gynhyrchu, cynhyrchu ac ôl-gynhyrchu, gan gynnwys golygu, sinematograffi; sain, dylunio cynhyrchiad (gan gynnwys mise-en-scène), naratif, arddull, genre. 
  • Cynhyrchion a ffurfiau: ffilm, teledu, sain (podledu a radio digidol), gemau fideo, gwefannau. 
  • Dosbarthu ac arddangos: llwyfannau ar-lein (gan gynnwys cyfryngau cymdeithasol a gwefannau ffrydio), sinema, teledu digidol, llwyfannau gemau fideo. 
  • Cynhyrchwyr a chynulleidfaoedd, gan gynnwys defnyddwyr, ‘cynhyrchwyr ddefnyddwyr’, gwylwyr, crëwyr cynnwys. 
  • Negeseuon, moeseg a materion: cynrychioli pobl, hunaniaethau, lleoedd a chymdeithas, rhaniad digidol, materion cyfryngau cymdeithasol (gan gynnwys preifatrwydd, tuedd a chamwybodaeth).