CBAC Sylfaen Lefel Mynediad / Lefel 1 Gwasanaethau Cyhoeddus

Mae gwasanaethau cyhoeddus yn chwarae rhan allweddol yn y gymdeithas yng Nghymru, gan sicrhau iechyd, diogelwch, addysg a llesiant y gymuned. Maen nhw'n ffurfio un o'r sectorau cyflogaeth mwyaf yng Nghymru, gan gynnig cyfleoedd ar draws gofal iechyd (GIG), gwasanaethau brys, llywodraeth leol, addysg a'r lluoedd arfog. 

Mae'r sector yn cefnogi isadeiledd hanfodol, yn hybu tegwch cymdeithasol, ac yn cyd-fynd â Deddf Llesiant Cenedlaethau'r Dyfodol.

Mae'r cymhwyster hwn yn rhoi cipolwg gwerthfawr i ddysgwyr i faes lle mae cyfle i wneud gwahaniaeth ystyrlon-boed hynny drwy rolau rheng flaen neu drwy arweinyddiaeth strategol. 

Mae'r Cymhwyster Sylfaen Cysylltiedig â Gwaith mewn Gwasanaethau Cyhoeddus wedi'i lunio i hyrwyddo profiadau galwedigaethol cadarnhaol i ddysgwyr rhwng 14 ac 16 oed mewn ysgolion sy'n gweithio ar Lefel Mynediad hyd at Lefel 1. 

Mae'n cynnig llwybr strwythuredig i ddeall rôl bwysig gwasanaethau cyhoeddus yn y gymdeithas yng Nghymru ac mae'n gweithredu fel sylfaen ardderchog i alluogi dysgwyr i symud ymlaen i hyfforddiant neu ddysgu ôl-16 ac, lle bo'n briodol, i astudio TGAU neu TAAU.