CBAC Cymhwyster Sylfaen Lefel Mynediad Cymraeg Craidd

Mae Cymraeg Craidd yn cynnig cyfleoedd i ddysgwyr ddefnyddio'r Gymraeg mewn lleoliadau cymdeithasol a lleoliadau gwaith, gan roi sgiliau gwerthfawr ar gyfer bywyd mewn Cymru ddwyieithog iddyn nhw.

Drwy ymgysylltu â chyd-destunau bywyd go iawn a thasgau ystyrlon sy'n gysylltiedig â gwaith, mae'r cymhwyster hwn yn ysbrydoli dysgwyr i ddefnyddio'r Gymraeg ac i gydnabod ei pherthnasedd a'i gwerth ymhell y tu hwnt i'r ystafell ddosbarth.

Gyda themâu ""yr ardal"" ac ""y gweithle"" yn ganolog iddo, mae Cymraeg Craidd yn cynnig cyfleoedd dilys i ddod yn siaradwr Cymraeg mwy hyderus.

Ar gyfer pwy mae'r cymhwyster hwn?

Mae'r cymhwyster hwn ar gyfer dysgwyr rhwng 14 ac 16 oed sy'n gweithio ar Lefel Mynediad 1 i Lefel Mynediad 3 yn y pwnc hwn.

Bydd yn datblygu ymhellach y ddealltwriaeth gysyniadol y mae dysgwyr wedi'i meithrin drwy eu haddysg Cwricwlwm i Gymru rhwng 3 ac 14 oed. Mae hefyd yn ymwneud â'r pedwar diben a'r egwyddorion cynnydd ac yn eu cefnogi. Bydd y cymhwyster yn gweithredu fel sylfaen eang ar gyfer symud ymlaen i astudio TGAU Cymraeg Craidd drwy ganolbwyntio ar ddealltwriaeth a sgiliau tebyg.