Heb gael y Canlyniadau Safon Uwch roeddech chi'n gobeithio amdanynt? Dyma beth i'w wneud nesaf

Felly, nid oedd diwrnod y canlyniadau wedi mynd fel roeddech chi wedi'i ddychmygu. Yn gyntaf oll, cymerwch anadl. Nid ydych chi ar eich pen eich hun, ac nid dyma ben y daith. Mae mwy o lwybrau nag y byddech chi'n meddwl, ac mae'r un gorau i chi ar gael o hyd. 

Dyma ganllaw i'ch helpu i ddarganfod beth gallai eich camau nesaf fod. 

 

Peidiwch â mynd i banig 

Mae'n hollol normal teimlo wedi eich llethu neu'n siomedig. Cymerwch eiliad dawel i chi'ch hun. Ewch am dro, siaradwch â rhywun rydych chi'n ymddiried ynddo, neu cymerwch eiliad mewn tawelwch. Mae penderfyniadau'n haws i'w gwneud pan fydd eich meddwl yn dawel. 

 

1: Ailsefyll eich arholiadau 

Os ydych chi bron wedi cael y graddau roeddech chi eu hangen, neu os oes gennych chi gynllun clir sy'n dibynnu ar gael canlyniadau uwch, efallai mai ailsefyll eich cymwysterau Safon Uwch yw'r dewis cywir. 

Meddyliwch am y canlynol:

  • Pa bynciau y byddech chi'n eu hailsefyll 
  • P'un a ydych chi'n barod i ymrwymo i flwyddyn arall o astudio 
  • Os yw'r cwrs, y brifysgol, neu'r swydd rydych chi ei eisiau/ei heisiau wir angen y graddau uwch hynny 

Siaradwch â'ch ysgol neu'ch coleg i weld pa gefnogaeth y gallant ei chynnig ar gyfer ailsefyll. 

 

2: Gofyn am ailfarcio 

Ydych chi'n meddwl bod eich papur wedi'i farcio'n anghywir? Gallwch chi ofyn am adolygiad o'r marcio neu ailwiriad clerigol. Ond byddwch yn ymwybodol o'r canlynol:  

  • Gall marciau fynd i fyny neu i lawr 
  • Rhaid gofyn amdano drwy Swyddog Arholiadau eich ysgol 
  • Mae yna ddyddiadau cau – felly os yw hyn yn rhywbeth rydych chi'n ei ystyried, gofynnwch amdano cyn gynted â phosibl. 


3: Gwneud cais drwy'r broses glirio 

Heb gwrdd â'ch cynnig prifysgol? Gallai'r broses glirio fod y peth i chi. Mae'n system lle mae prifysgolion yn rhestru lleoedd sydd ar gael ar gyrsiau, ac efallai y byddant yn dweud ie wrthych, hyd yn oed os nad oeddent ar eich rhestr gyntaf o opsiynau. 

Mae'r broses glirio yn ddelfrydol os ydych chi:

  • yn agored i astudio yn rhywle newydd 
  • yn hyblyg o ran cyrsiau 
  • eisiau mynd i'r brifysgol eleni 

Ewch ar dudalen UCAS Clearing am gyngor a'r wybodaeth ddiweddaraf. 

 

4: Cymryd blwyddyn i ffwrdd 

Ddim yn siŵr beth i'w wneud eto? Mae hynny'n hollol iawn. Mae blwyddyn i ffwrdd yn rhoi amser i chi wneud y canlynol:

  • Teithio neu weithio dramor 
  • Ennill profiad mewn swydd yn agos at gartref 
  • Ailymgeisio i'r brifysgol y flwyddyn nesaf gyda phen cliriach (ac efallai gyda graddau gwell hyd yn oed) 

Nid yw hwn yn gam yn ôl, mae'n gyfle i ddechrau o'r newydd ac i wneud penderfyniadau mwy hyderus yn nes ymlaen. 

 

Siaradwch â rhywun 

Beth bynnag rydych chi'n ei feddwl ar hyn o bryd, nid oes rhaid i chi ddatrys y cyfan ar eich pen eich hun. Siaradwch ag:

  • Athro neu ymgynghorydd gyrfaoedd 
  • Eich rhieni neu'ch gofalwyr 
  • Rhywun sy'n eich adnabod chi ac sy'n gallu eich helpu i weld eich cryfderau 

Gallant eich cefnogi neu eich cyfeirio tuag at gyngor arbenigol. 

 

 
Efallai y bydd heddiw yn teimlo fel rhwystr, ond gallai hefyd fod yn ddechrau rhywbeth anhygoel nad oeddech wedi'i gynllunio eto. Y peth mwyaf pwysig? Daliwch ati, mae llawer o lwybrau ar gael i chi. 

Mi fyddwch chi'n iawn 💪