Canfod cymwysterau ac adnoddau
Manylebau TGAU Gwyddoniaeth CBAC
16 Mehefin 2010
Dysgodd CBAC ddoe gan Ofqual, rheoleiddwyr arholiadau, na chafodd ein manylebau TGAU Gwyddoniaeth drafft, a baratowyd ar gyfer eu haddysgu o Fedi 2011 ymlaen, eu hachredu.
Mae'r cyrff dyfarnu i gyd yn yr un sefyllfa; fe'n cynghorwyd gan Ofqual bod nifer o faterion i'w datrys cyn y gellid ail-gyflwyno'r manylebau drafft i'w hachredu.
Mae arbenigwyr pwnc CBAC eisoes wedi dechrau'r broses o addasu'n manylebau yn ôl yr adborth a gafwyd. Rydym yn awyddus i gwblhau'r broses mor gyflym ac mor effeithlon â phosibl, fel bod athrawon yn gallu defnyddio'r adoddau newydd mewn da bryd i baratoi eu rhaglenni dysgu.
"Mae athrawon ac ymgynghorwyr wedi dangos cryn ddiddordeb yn ein manylebau newydd" meddai Gareth Pierce, Prif Weithredwr CBAC. "Rydym yn siomedig na chafodd y manylebau eu hachredu ar ôl iddynt gael eu cyflwyno i'r rheoleiddwyr y tro cyntaf, ond yn hyderus y bydd ein harbenigwyr pwnc, sydd wedi ymgynghori'n eang ag athrawon ac aelodau'r gymuned wyddoniaeth, yn gallu cwrdd ag anghenion Ofqual.
"Dyma'r cylch adborth cyntaf a gafwyd ar fanylebau newydd ers i Ofqual ymgymryd â'i gyfrifoldebau statudol llawn fel rheoleiddiwr annibynnol. Bydd y ffordd y dehonglir y meini prawf ar gyfer manylebau wrth fynegi safonau yn datblygu'n fater trafod pwysig."
Pan fydd rhagor o newyddion ar gael am y datblygiadau diweddaraf, fe'u rhoddir ar y wefan.
Nodiadau
Manylebau newydd ar y gweill:
- Gwyddoniaeth A
- Gwyddoniaeth Ychwanegol
- Bioleg
- Ffiseg
- Cemeg
- Gwyddoniaeth B
- Gwyddoniaeth Gymhwysol Ychwanegol
Gwybodaeth bellach
Ceri Thomas - Rheolwr Marchnata a Chyfathrebu
ceri.thomas@cbac.co.uk